星期六, 同事輪流放假, 今天我的任務是在女復康病房巡房。九時正, 我準時踏進病房。

未走到1號床, 已聽到傳來一片歡樂的歌聲。。。

「起來, 不願做奴隸的人民。。。。」

坐在床上的婆婆高聲唱着。

「嘩,婆婆, 你好開心喎, 咁好唱口嘅。」我對婆婆説, 其實我首先要看的是她對面的婆婆。

「早晨醫生! 係呀, 我好鍾意唱歌㗎。哈哈!醫生, 你咁後生嘅?」婆婆笑逐顏開。

口罩一向是醫生恩物。戴上口罩, 醫護人員都變年青了。

「你好鍾意唱國歌㗎?」我再問。

「係呀, 我細細個就一班人學唱歌。唔淨係唱國歌㗎, 我仲識唱英文歌。」婆婆自豪的說。

「🎼🎼🎼🎼🎼🎼🎼」

婆婆立刻哼着一首我不認識的英文歌。

「咦? 做乜唔唱國歌呀今日? 」護士 G 剛從外面走進來, 她問婆婆。

看來開朗的婆婆真的很愛唱歌, 病房同事都清楚知道。

性格樂觀, 時常都心情愉快, 的確是一份福氣。

走到3 號床, 看看另一位婆婆。翻看牌版, 她已經 84 歳了, 有末期腎衰竭。她不願意洗腎, 正接受支援性治療。她今次因為不肯進食而入院。

「婆婆, 你做乜唔食嘢嘅? 」我走到病床邊, 細聲問婆婆。

「仲食乜呀, 都就死囉。」躺在床上的婆婆半合雙眼, 輕描淡寫地回答我。

「你有無乜嘢唔舒服呀?」

「周身都唔舒服啦, 無用啦。」婆婆繼續閉着雙眼。

「你好似好唔開心咁嘅?」

「我係唔開心呀, 都就死, 有乜開心唔開心呀。。。。」

一時間, 我也不懂怎樣回應。

婆婆有着長期病患, 又總想着自己將要離開人世,心情可以想像。

走到護士站跟照顧她的同事説起。。。

「佢好惡㗎, 同佢換片佢會粗口鬧人㗎, 仲會踢人。」

心情惡劣, 周圍的人和事, 都好像變得是不懷好意。

如何能改變婆婆的心情和想法, 的確不是一件容易的事, 需要多作深入的了解和溝通。

同一個病房, 不一樣的心情, 醫護人員就正是時刻與病友經歷着喜。怒。哀。樂。

• • •

想閲讀最新的醫護人員博客文章?快點關注我們的Facebook Page吧!

每日遊走醫院的大夫,很多所見所聞所感所想希望跟大家分享。

留下答覆

Please enter your comment!
Please enter your name here